機場神奇俠（三）：緝毒父子兵

熙來攘往的機場行李認領大堂內，海關搜查犬領犬員楊震宇（Edwin）牽着拍檔Vassos於行李輸送帶間穿梭巡邏。一人一狗身穿整齊制服，步姿英挺，在旅客中顯得格外醒目。他們隸屬香港國際機場海關搜查犬組，負責打擊機場毒品走私活動。

 

配對搜查犬　過程如相睇

 Edwin加入香港海關八年，曾在不同關口擔任不同職務。他小時候曾飼養狗隻，故特別嚮往與牠們共事，五年前他申請調任領犬員，並獲派駐機場。Edwin語帶興奮地說：「我好鍾意飛機，細個住啟德機場附近會望到飛機經過，又成日聽鄰居講佢做飛機維修嘅故事。依家可以講係一次過滿足晒兩個願望，既可以同狗仔一齊做嘢，又可以成日近距離接觸飛機。」

現時機場共有11名海關領犬員，各自引領一隻搜查犬。海關搜查犬主要由外國引入，領犬員獲選後須到海外，按各人性格及經驗，配對合適的搜查犬，再共同進行為期十星期的訓練，合格後方可成為真正的領犬員。「訓練前會有人同你傾吓計，了解咗你性格先分配搜查犬俾你，成個過程就好似相睇咁。」

Vassos是Edwin第二隻狗拍檔，他憶述彼此初次見面：「我對佢嘅第一印象就係靚仔同極度貪玩！」Edwin續說：「其實做搜查犬貪玩好緊要！平日Vassos揾到毒品，我會同佢玩遊戲嚟獎勵佢，所以對佢嚟講係無開工呢回事，每次出更佢都當玩。」

 

彼此拍住上　默契最重要

 Edwin及Vassos會到機場不同地方工作，除了行李認領大堂外，Vassos亦會嗅查抵港閘口的旅客及手提行李、行李處理大堂的寄艙行李、各貨運站內的貨物，以至停機坪上的地勤設備；牠還會走進飛機，搜索機上是否藏有違禁品。一般而言，Edwin會引領Vassos搜查特定目標旅客或物件。機場每天接待數以萬計旅客，要決定搜查目標，極之考驗Edwin的判斷力。

Edwin表示：「好多時犯人嘅神情舉動會透露出心虛同緊張，我哋時刻都要保持警覺，揾出可疑人物，再指示搜查犬做進一步行動。」搜查犬亦非只聽從命令，每當嗅到可疑氣味時，牠們也會主動出擊。「當然會有旅客因為怕狗而避開Vassos，但都可能係罪犯想避開搜查，呢個時候就好靠領犬員嘅觀察同經驗。」

除了觀人於微，領犬員亦須十分了解其搜查犬。訪問當天，沾有毒品氣味的道具行李箱於輸送帶上緩緩經過Vassos面前，牠便緊隨其後用鼻子推動行李箱；當道具行李箱放在一旁時，牠則乖乖坐在旁邊，藉此示意Edwin物件有可疑。Edwin說：「有時Vassos聞到嘢食，譬如海味都會好興奮舔吓個鼻，我要準確解讀佢嘅反應，呢樣要靠大家相處培養嘅默契先知道。」

 

互相依靠　情如父子

 問到當領犬員與過去海關工作的最大分別，Edwin說：「多咗個好拍檔囉，哈哈！以前無固定拍檔，依家我開工Vassos又開工，我放假佢又放假。」多一個拍檔亦多幾分責任，每個領犬員均須照顧其搜查犬的日常飲食、清潔及運動，亦要監察着狗隻體重及健康情況。「好似父母湊細路咁，最怕就係佢有事！平時放假要交托Vassos俾其他同事照顧，時間一長就心掛掛，會忍唔住問同事佢嘅情況。」

Edwin與Vassos形影不離，互相信任依靠。Vassos固然是Edwin的好幫手，Vassos亦令Edwin更加享受及投入工作。「狗仔好單純、直接，有時做嘢辛苦，望住佢傻更更個樣，又會開心番。同佢工作嗰種滿足感，無嘢代替到！」Edwin續說：「同狗仔一齊成功揾到毒品，拉到犯人嗰刻就最滿足同驕傲！」

訪問當天，我們造訪海關搜查犬組於機場的辦公室，其中一道牆上貼滿歷年來領犬員成功破案的英勇事蹟，當中包括Edwin的相片。於2014年，Edwin和前任狗拍檔Homer於搜查轉口貨物時，觀察到Homer對貨物有特別反應，仔細檢查時發現了價值約30萬港元的毒品。

搜查犬一般到八歲便退役，但既是親密如父子的好拍檔，又怎捨得分開。Edwin說海關有領養計劃，領犬員可優先領養其搜查犬，像Edwin便領養了前拍檔Homer。Edwin笑說：「Homer第一日返到屋企仲以為自己要執行任務，將我屋企裏裏外外都聞過一次，肯定無違禁品先慢慢放鬆落嚟！」

機場裏每一位海關領犬員和搜查犬，都是堵截毒品流入香港的前線守衞，他們心中堅守着保護全港市民安全的信念。