本地民航機師Hank用了七年時間，完成了首架100%在香港組裝的小型飛機──飛機所有部件均由Hank及他的團隊訂購及裝嵌，並將於11月15日在香港國際機場首次起飛。
要成為三個第一：首架100%在香港組裝、在本地獲得認證，以及在香港首航的小型飛機，起初Hank的夢想並未獲看好。「成個亞洲區裏面，其實可以飛小型機嘅地方唔多，一般嚟講大家都係喺泰國、菲律賓呢啲東南亞國家飛，因為佢哋有足夠地方俾小型飛機飛。香港、東京、大阪等都市，由於國際航線班次頻繁，基於運作同安全因素，一般唔會有小型飛機升降。」香港國際機場作為區內的主要航空樞紐，Hank要在這裏首航，必須達到多方面的極高要求。
「起初有啲朋友會同我講『要砌飛機喺外國咪仲易，做乜專登要喺香港砌』、『香港都冇小型機場、要喺International airport飛難過登天呀』等，勸我捨難取易，但係我始終想香港能夠有一架屬於自己嘅小型飛機，喺自己嘅機場首航。」就是這一份堅持，推動Hank七年多以來不斷努力，克服重重挑戰。
「能夠走到今日呢一步，絕對唔係靠我一個人可以做得到。一路上有好多人同機構都幫我哋開路，無論係有份砌呢架機嘅一班聖保祿中學學生；我哋Project team嘅一班國泰同事；幫我哋為呢架機測試，確保達至安全要求嘅港機工程師，以及負責批核及提供升降時段嘅民航處同機管局等，冇咗佢哋，我呢個夢想係冇可能實現。」
Hank的終極目標是能夠用「Inspiration」載人環繞世界一周。「雖然依家距離呢個目標仲好遠，但我哋已踏出咗最重要嘅一步！」
小型飛機命名為「Inspiration」，是希望藉此啟發年輕人追尋夢想。
機尾的圖案象徵着獅子山精神。
Hank小時候最愛砌模型飛機，成為機師後，如今更自行組裝小型飛機。圖中為與「Inspiration」同型號（RV-8）的模型飛機。
#香港起飛 #Inspiration #BKOO #RV8 #自己飛機自己砌 #夢想啟航