談及Nicole的工作，不少人都會感到好奇，因為她值班的地點是很少人能夠踏足的機場政府貴賓室。這裏是接待各國元首、皇室貴族及重要官員的地方，即使是機場員工，也只有少數人曾經到訪。
貴賓室共有約35位員工，他們的工作包括協助貴賓辦理出入境及海關清關手續、託運及認領行李，也要接送貴賓往返閘口。Nicole加入貴賓室約半年，她說在這裏工作最重要是細心。她解釋道：「有時航空公司或外國出入境部門會有特別規例，例如美國要旅客事先提供當地住址，你要清楚哂呢啲事項，預先問定個客幫佢安排好。」
Nicole表示，除了自己負責的客人外，亦要清楚整個貴賓室的日程。「幾時會有咩人嚟，我哋全部要知，萬一遇上航班延誤等情況，原本負責嘅同事未能夠接待客人，其他同事都可以即刻接手。」
Nicole坦言，剛開始時的確感到有點壓力。「我記得第一次送客人去閘口，我個腦一直諗住條路應該點行，個客突然主動同我傾計，當時我嚇咗一跳之餘亦好緊張，都唔記得自己講咗啲咩。」但日子久了，工作也漸漸上手。「貴賓室啲客其實同一般旅客無大分別，只是身分比較特別，佢哋普遍都好客氣。」
這麼特別的工作，到底Nicole是如何找到的？「其實都係機緣巧合。我最初係做機場大使，嗰時曾經喺貴賓室實習一個月。機場大使計劃畢業嗰時，呢度咁啱有空缺，就入咗嚟做，呢份係我第一份正式工作。」Nicole指以前的經驗讓她獲益不少。「以前喺客運大樓做顧客服務，遇到嘅人多好多，問題五花八門，令我學識唔少應對技巧。」
Nicole(左)大專修讀計算機科學，但發現原來編寫電腦程式並非其強項。畢業後她申請當機場大使，她說這份工作可以見到不同國家的人，比較有趣。
至於在貴賓室工作的最大得着，Nicole說這裏讓她見識到特別的人和事。「例如有次某個國家公主到訪，領事、航空公司高層等出嚟列隊歡迎，呢啲畫面通常只會喺電視上見到。」
對於現在的工作，Nicole感到很滿足：「我哋就好似香港嘅一面鏡，客人對我哋嘅印象，就係佢哋對香港嘅印象，我希望香港喺佢哋心目中係一個友善嘅城市。」
Nicole說不少機場大使畢業後都留在航空界發展，經常也會在機場碰到熟人，他們更會偶爾相約聚餐。