辦公室內對講機聲、電話聲此起彼落，一個個電腦屏幕顯示着各種複雜的圖案，房內各人一邊全神貫注地留意屏幕上的訊號變化，一邊不停地接聽電話，忙得不可開交。別誤會，這裏不是股票交易所，而是機場故障應變小組的辦公室。
風火水電 瓣瓣要掂
這個小組負責綜合處理機場設施的緊急技術問題，由客運大樓冷氣、供水系統、登機橋，以至行李處理系統及飛行區燈號等，都是他們的工作範圍。小組成員大多是經驗豐富的工程及維修部同事，對機場不同設施的結構有深切了解。
故障應變小組約有60位成員，須24小時輪班工作，梁志平就是其中之一。「我哋主要喺兩方面接case。第一係由前線運作同事報信息入嚟，啲信息會轉做一張job card，顯示有咩要跟進；第二就係打電話入嚟喇。」梁笑着說：「宜家仲有第三個渠道，就係WhatsApp。」
反應迅速 判斷準確
偌大的機場有數以百萬計的儀器及零件，當中任何一個地方發生問題，都可能會由故障應變小組處理，工作量及繁複程度可想而知。小組每天接收數百宗大大小小、不同類型的個案，這些個案會分別由四個小隊處理，包括建築及基礎建設、機電系統、土木工程，以及行李處理及飛行區特別系統。在機場工作了18年的梁志平說：「雖然每個同事都有自己睇開嗰瓣，不過對其他系統都要有一定了解，就好似急症室醫生，咩都要識，有需要時先可以互相照應，而且要隨傳隨到，打風落雨都唔例外。」
「不過我哋背後仲有大靠山嘅，就係所有工程及維修部同事，如果唔係我哋得嗰幾十人，日日有幾百個case，點做得掂！」
面對複雜的系統，梁志平都瞭如指掌：「熟悉機場各個系統，先可以盡快諗到方法應付問題。」
故障應變小組成員還有一個重要的共通點，就是反應快、夠果斷。
「技術問題對機場運作嘅影響可大可小，我哋接到case一定要迅速分析情況，決定應對方法。」梁以之前發生的一宗個案為例：「嗰次一隻1 500KVA嘅高壓火牛壞咗跳掣，係我哋第一次面對呢個情況。」機場電掣房有數組高壓火牛，每組供電給機場不同的系統及租戶。「當時心諗，如果要立即搶修隻火牛，都要一段長時間。我哋即刻計數，評估完後認為另一組火牛可以承擔起跳掣火牛嘅電力負荷，就立即以相關裝置切入，將受影響系統恢復。」小組憑着專業知識及經驗，當天只花了11分鐘便令電力恢復，迅速的反應和準確的判斷更獲得上司表揚。
顧客服務 一樣要識
有別於一般人對工程人員的印象，梁志平說起話來滔滔不絕，口才了得，不說還以為是資深的銷售人員。他笑着解釋說：「我哋有時需要同租戶接觸，所以都要識啲顧客服務技巧。」
梁續解釋：「我哋日日收咁多case，梗要分先後，譬如有鋪頭壞咗盞燈，對旅客嚟講影響相對小，係非緊急事件，未必第一時間處理。但個客點會知你其他地方發生咩事，梗係認為你應該第一時間幫佢搞掂。佢打嚟追問，你點樣應對，同喺有限資源下盡快幫個客解決問題，都係一門學問。」
故障應變小組除了要應對技術故障，平日也需外出監督各樣恆常維修工作。
千奇百趣 工作添生趣
在機場出現的技術問題林林總總，有些個案看似簡單，但實際上並非容易解決。梁舉例說：「好似跳電掣搞到停冷氣，喺屋企就話啪個掣可以好快開番，但機場冷氣系統比家用嘅大型得多，重啟需時都長啲。而且有啲機所在位置，可能要得到政府部門許可先可以入，嗰度都已經花咗唔少時間。」
另外更不乏千奇百怪的個案，例如曾經有旅客不小心將護照卡在客運大樓圓柱旁的地板，故障應變小組要馬上拆掉不銹鋼板將之取出；又試過有旅客的護照跌進機橋邊位，小組也要快速從隙位拾回護照。
梁志平身後是機場其中一個冷氣系統。一號客運大樓共有六部這樣大型的冷氣系統，持續為客運大樓製冷。
每天應付緊急情況，工作壓力一定不少，梁志平在放假時會行山及游水，放鬆身心，更喜歡相約同更同事一起行山玩樂，在紓緩壓力之餘，亦可培養默契。
#機場神奇俠 #萬能機電王 #隨機應變 #故障應變小組 #工程 #風火水電