機場神奇俠（三）：空運兄弟

機場神奇俠３：空運兄弟

機場貨運停機坪是一個充滿「佬」味的地方。重型車輛載着沉重的貨物，絡繹不絕穿梭於貨運停機坪與機場空運貨站；一位位老練的貨運員工，熟練地駕駛着長長的拖車，將貨箱運送到不同區域，24小時不停運作，從不間斷。在香港空運貨站（Hactl）任職的凌立和鄭煒財（財哥）在貨運停機坪分別工作超過10年及近20年，於停機坪上經歷的一切，無疑成為了他們人生的一部分。

甫走進貨運區，便看到運輸車絡繹不絕穿梭往返貨運停機坪和機場空運貨站，拖著一卡卡貨箱，運送到不同區域。這時候，在機場空運貨站任職的凌立和鄭煒財（財哥），正好駕著一輛運輸車停在我們面前，二人面上掛著燦爛的笑容，像這個24小時不停運作的地方一樣，充滿活力。

中年轉業　室內變戶外

「大約喺10年前，我放棄工作咗20幾年嘅製衣業投身機場，當時身邊嘅朋友都覺得好愕然。」現時任職主任的凌立回想入行的過程：「當時喺報紙見到貨運統籌員嘅招聘廣告，膽粗粗想試吓，同做機場嘅朋友打聽過吓工作環境後就嚟應徵面試，就係咁入咗呢一行。」轉行前凌立的工作是在板房內製作紙樣，轉行後工作環境變成了 的停機坪。人到中年面對轉變，他非但沒有不適應，還慶幸作出了這個決定：「入嚟機場之後，先發現自己其實幾鍾意戶外工作，最重要係停機坪見到嘅嘢，喺其他地方都見唔到。」

說到難忘經歷，他回憶道：「記得有一次要安排一位國家元首嘅專用飛機喺貨運站降落，我覺得好奇怪，點解唔喺客運大樓嗰邊落呢？原來飛機上載有國家元首專用嘅防彈轎車，而元首就喺停機位坐上轎車直接駛離機場。雖然我哋只係從旁候命，但你諗吓一世人有幾多機會可以咁近距離見到呢啲場面，真係好難忘！」

遊戲人生　情同手足

財哥於空運貨站工作了34年，現職資深貨站服務員，一身黝黑皮膚，連身上的制服也留下歲月痕跡。無獨有偶，他當年亦曾在製衣業工作，17歲時已是布廠機器維修師傅，以當年來說收入相當不俗。當時他的朋友在機場工作，便跟對方去看看，想不到後來一入行，便做了34年：「講真，開頭係貪得意，諗住做幾年就轉㗎啦！噯點知做落就發覺原來好啱自己。我1983年加入公司，嗰陣仲喺啟德機場，當年要入機場做嘢好難㗎，唔單只要查你有無案底，而且仲要鋪保，好大陣仗！」

凌立說：「做貨機係要成組人一齊做，唔係自己一個人做得嚟，呢樣同以前我一個人畫紙樣好唔同。」貨運停機坪上的每架貨機，均有一組約10人的停機坪服務員去「服侍」，分別擔任不同崗位：有人會駕駛平台車裝卸貨物，亦有人駕駛拖車將貨物運往空運貨站，還有在地面協調各成員的小組指揮，隊員之間甚有默契，合作無間。在旁的財哥點頭認同，說道：「成組人夾得埋係好重要，做機嘅時候能夠齊上齊落，否則一亂就影響效率。」全組同事不少已共事多年，財哥笑言：「已經變咗係真兄弟，大家放假都會一齊玩，甚至去旅行。」

與時間和天氣競賽

「一般嚟講，一架貨機到達後，往往要喺兩小時內完成貨物裝卸工作，有時甚至只有100分鐘，絕對係分秒必爭。」凌立在解釋停機坪的工作時說。以一架波音747-400貨機為例，其最高載貨量超過120公噸。換句話說，停機坪貨運員工需要將過百公噸貨物由飛機運往貨運站，然後由貨運站將一百多公噸的貨物裝上飛機，而這些工作都必須在一個多小時內完成。

當遇上惡劣天氣，航空公司都想在颱風信號發出前盡量完成貨物裝卸，而在颱風過後，因為要盡快處理積聚的貨物，又會是另一繁忙時間。凌立說：「我哋每日都要同時間競賽，如果喺打風前後嘅時間，真係好似打仗咁，班手足忙到無停手㗎！」事實上，除了貨物以外，空運貨站的職員亦需要協調其他飛機後勤服務，例如加油、飛機餐飲、機艙清潔等，絕非如大眾想像般簡單。

從開荒牛到幕後功臣

自香港國際機場啟用以來，空運業急速發展，現今更是全球最繁忙的貨運機場，兩人置身其中，為這個行業愈趨興旺而感到自豪，同時亦面對更多挑戰。財哥說：「於啟德年代，根本無得落停機坪卸貨裝貨，嚟到呢度，多咗好多配套，雖然多咗嘢做，但成班同事好似兄弟咁，緊密合作，再困難嘅情況都一齊面對同處理，最後收到航空公司嘅嘉許信，嗰種滿足感真係難以形容，之前幾辛苦都唔記得晒。」

入夜後，停機坪亮起點點燈光，夜班的同事接更，貨機繼續升降，服務員如常裝貨卸貨。一個行業的興盛，其實是一群充滿熱誠、緊守崗位的人一起累積的成果。