提起飛機負重，腦海即時浮現以下景象：血拼完畢的旅客在機場客運大樓把大包小包戰利品往行李箱狂塞；在暑假前後的登記櫃檯，到海外升學的學生在行李過磅時暗暗祈求行李不會超重⋯⋯其實，除了乘客的寄艙行李外，客機貨艙還要裝載各種貨物，加上飛機的燃油重量、乘客座位的分布等，都會影響飛機的平衡負重，必需準確計算才能確保安全飛行。
負責在背後確保飛機平衡負重，控制貨物種類及重量平均分布的是配平員（Load controller）。Mike擔任配平員超過八年，早在1994年他已開始在機場工作，起初擔任地勤人員：「嗰時啱啱讀完書想揾份冇咁悶嘅工，結果就入咗呢行，一做就廿年！當時啟德冇依家機場咁忙，工作輕鬆好多！」
飛機倉庫番 腦筋急轉彎
每位配平員每日大概處理七至八架飛機的負重計算，哪麼工作又是否如方塊遊戲一樣？「差好遠！我哋嘅工作除咗要分配唔同重量嘅貨喺適當位置外，仲要同時間競賽！由乘客開始登記到飛機起飛之間嘅一兩個鐘，就係我哋嘅作戰時間！呢段時間內，天氣、客量、航班有無延誤等因素都會影響架機載幾多貨，所以架機一日未起飛一日都有變數！我哋同時間可能處理緊唔止一架機，所以心水清好緊要！」
Mike說着便繼續講述經歷：「試過一次做架全球最長途嘅機，飛成15個鐘，客同貨都好滿，總之就要用盡架機負重。咁啱遇着天氣唔好，機師要攞多2 000公斤油，咁我即時要諗，有啲貨又一定要走，究竟係要卸貨，叫停旅客登記，定點樣呢？轉數慢啲都唔掂！」難怪Mike口齒伶俐，無他，因為這份工作本身，就是要平衡乘客（載客量）、貨運（貨重及貨物種類）及飛行技術需求（燃油量）等多方面因素，除了轉數快之外，還需要出色的溝通技巧。
特別貨物 特別處理
機場每日處理來自全球各地過萬噸貨物，要安排不同的貨物上機，有什麼竅妙呢？Mike駕輕就熟地開啟電腦程式介紹：「呢度一格格就係貨艙，你見到呢隻機有五個艙，我哋就係控制每個艙幾重，同裝啲咩貨。有啲艙冇溫度調節，飛到上天隨時去到零下二十幾度，所以唔係樣樣貨都放得！放錯貓貓狗狗就大鑊喇！」
其他需要特別處理的貨物還包括乾冰、鋰電池等，「呢啲物品都要好小心處理，特別係唔可以擺得太近有動物嘅艙。」Mike補充說：「真係咩貨都有！每年伊斯蘭朝聖嘅時間，連聖水都會運，呢啲水會用一個個白色桶裝住，專程由麥加運過嚟！」
悶？日日唔同，有新鮮感就真
每天在辦公室計算飛機負重，對着一大堆數字，不會悶嗎？Mike聽到這問題，暗笑道：「做飛機配平千變萬化，都唔知幾有新鮮感！」每逢聖誕、農曆新年假期等旅行高峰期，Mike的工作就更加忙碌，多年來家人對此亦習慣了：「人哋大時大節去玩，我哋就係最忙。不過我就係鍾意唔駛放假都同人逼！」
工餘時間最大樂趣？「打機就唔多啱我喇，返工已經要成日對住數字，放假就梗係要做多啲運動，等個腦休息吓啦！我哋周不時都會同航空公司、登記櫃檯同埋貨運嘅行家踢波，順便聯誼吓！呢行都有好多波友架！」Mike摸着辦公桌上的球會水杯說，看似有幾分技癢。
#機場神奇俠 #無名英雄＃平衡負重 ＃配平員 ＃機場 ＃精密計算 ＃安全升降 #空運