走進香港國際機場客運大樓，經過多重保安檢查後，終於來到位於地庫的行李處理大堂。在這個繁忙的地下世界，牽引車拖着一列列拖卡穿梭來往，拖卡內放滿了各式各樣、大大小小的行李；舉目四望，一條條行李輸送帶縱橫交錯，不停運轉。
於處理過境行李的區域，小娟正聚精會神地為經過面前的行李貼上貼紙。這些看似普通的貼紙，原來是RFID（無線射頻識別技術）晶片標籤。所有由香港出發的行李寄艙時掛上的標籤都會內置這些晶片，讓行李處理系統可快速讀取晶片內每件行李的資料，再自動將行李送到所屬航班的輸送帶。既然出發行李都附有RFID晶片，那為甚麼還要為面前這些行李貼上晶片標籤？小娟解釋道：「過境行李因為唔係喺香港出發，所以唔會有晶片標籤，佢哋喺進入行李處理大堂輸送帶前，要靠我哋人手補貼上晶片標籤，先可以繼續餘下嘅旅程。」她又說：「不過唔係件件過境行李都要貼晶片，行李過系統時上面着綠燈，即係行李本身已經有晶片標籤，唔使黐。」
這張橙色小貼紙就是RFID晶片標籤，其資料讀取率平均約為97%，遠高於條碼標籤平均約80%。
眼明手快最緊要
到底一天要處理多少件沒有附RFID晶片的過境行李？小娟邊換新貼紙邊答道：「我無仔細計算過，但我每一更用9至10卷，都有成幾千件行李架，忙起上嚟十幾卷都有！」但見一件件行李在小娟面前急速掠過，會不會偶爾失神或錯手漏貼？小娟馬上示範將幾張晶片預先貼在手指頭上，自信滿滿地說：「呢啲叫眼明手快，準備定咪無走雞囉。」她續說：「萬一貼漏後面仲可以補飛，個系統會將件行李揀出嚟，等同事可以補貼番晶片標籤喺件行李上。」
香港國際機場早在2005年開始已率先使用RFID技術。傳統的條碼技術可能會因為標籤被遮蔽，令掃描器未能讀取標籤資料；而RFID的掃描器則能以360度全方位掃描標籤，不但可靠，更能加快行李處理速度。雖然RFID晶片標籤無須貼在指定的平面上，但為了萬無一失，一般會選擇貼在行李上比較平滑的表面。那有甚麼會難倒工多藝熟的小娟呢？她笑說：「有啲特別形狀嘅行李要特別處理囉，例如單車、電視、高爾夫球棍，試過有啲圓碌碌嘅行李，都唔知應該黐邊度！」
千手觀音？小娟笑說：「趁行李未到，貼定啲標籤上手準備定先啫。」
工作天天不同
除了貼RFID晶片標籤還有甚麼工作？「開心果」小娟笑咪咪說：「黐晶片只係我哋其中一樣工作，我哋仲有其他嘢做架，例如去七樓登記大堂收啲客嘅特大行李，每個崗位大家輪住嚟做。做其他位置就要多啲同人溝通囉，因為要嗌下對講機、同其他同事合作又會對到啲客。不過我好鍾意講嘢，所以對我嚟講無難度。」
最後，問到小娟工作以外的活動，她興奮地說：「我最鍾意放假時約埋班同事，幾個一齊去旅行，網上有啲超平機票，要鬥快搶架！叫做『秒殺』呀，你有無聽過？」果然是眼明手快！
＃機場 ＃寄艙行李＃RFID ＃標籤＃過境行李＃眼明手快