雖說「廚房重地，閒人免進」，但在國泰航空飲食服務（香港）有限公司製作廚師主管Leo的帶領下，我們走進了位於生產大樓二樓的餐務部。這裏是製作飛機餐的心臟地帶，共有16個廚房，負責處理各種食材和飛機餐的不同製作流程。Leo一邊穿過如迷宮般的廚房，一邊如數家珍地介紹着這個工作了11年的地方。
重質亦重量
在處理生果的廚房內，師傅把一個大西瓜放在桌上，手起刀落，不消一會便將西瓜皮去掉，剩下一個紅紅的西瓜磚，切粒後便成了飛機餐的美味生果盤。餐務部每日平均生產75 000份飛機餐，單是西瓜便有三至四噸（旺季時更可能多達八噸），數量相當驚人。旁邊的Leo解釋說：「我哋廚房每朝7點就開始運作，每日處理超過27 000公斤食材，食物煮完之後要急速冷凍，即係將食物溫度降至攝氏10度以下，確保食物安全。烚嘅食物可能半個鐘至一個鐘就凍，但一啲燴嘅食物就要耐啲，可能要冷凍兩至三個鐘。航班起飛時間前24小時內就會開始做擺餐嘅工序，最後上餐車，然後送出停機坪運上飛機。」
航膳製作的分工非常仔細，每一個步驟都由特定的同事負責，務求達到最高效率。
處理製作飛機餐的食物程序繁複，加上數量龐大，一點也不簡單。Leo坦言，對公司各崗位的同事來說，「時間」永遠是最大的壓力：「冇可能要飛機為咗等餐而遲飛，所有嘢一定要準時，睇住航班起飛時間做嘢。」遇上惡劣天氣而令航班延誤，挑戰將會更大：「出面打完風，就輪到我哋呢度打仗。飛機起飛時間變咗，本來嘅早餐可能已經變成晚餐，就要重新做過，好多嘢都要喺極短時間之內重新安排。」
除了工作進度外，餐務部亦嚴格監控衞生標準，Leo強調：「整飛機餐唔係話味道唔緊要，但上到高空，食物安全永遠係最重要！」
「飛」一般廚房：挑戰、機器、特別餐
Leo於中華廚藝學院畢業，主修中菜。2004年加入國泰航空飲食服務，由見習生做起，現在是公司最年輕的「黑鈕」（製作廚師主管）。究竟作為空廚與普通廚師有甚麼分別？「啲人鍾意攞飛機餐同餐廳食物比較，其實唔係好公平。新鮮煮好上碟嘅食物當然好味啲，而飛機餐要先冷凍上到高空再翻熱，食物嘅味道一定會唔同即整即食嗰啲。而且，基於食物安全，魚生、半熟蛋同埋有細骨嘅魚係唔會喺飛機餐出現。呢個係我哋嘅限制……但亦都係挑戰。」Leo充滿自信地說。
航膳廚房裏有很多一般廚房沒有的大型機器，例如奄列機、炒飯機（自動炒燉鍋）、自動擺盤機等。Leo說：「機器主要喺力量上幫助人，如果數量太多，只靠人力就好容易勞損。不過一啲細微嘅工序，例如包雲吞同埋為商務客艙飛機餐擺餐，就始終要人手做。」
除了上述的輔助機器，製作不同種類的特別餐也是航膳所獨有。國泰航空飲食服務提供超過30款特別餐，當中包括小童餐、醫療餐、素食餐、宗教餐等，其中猶太餐的食材需要特別認證，在製作過程中還要祭司主持相關宗教儀式，這是一般廚師未必有機會接觸到的。
奄列機上有自動噴油和噴蛋漿的裝置，員工只需將蛋塊對摺做成奄列，再放進膠碟內便可。一部奄列機每天平均可製作6 000至8 000份奄列，大大提升速度和節省人手。
這部在香港研發的自動擺盤機，每小時可處理超過1 000個飛機餐托盤。
見到掛於盤邊的三角小圈，便知道這是清真廚房的用具，可謂見微知著。
從中廚到R&D：廚房其實比想像中大
「當初入嚟諗住做中廚，着眼點係點樣煮好一個餸，做耐咗之後就發現其實可以探索好多其他嘢。好似我依家做R&D(研發部)，嘗試用新食材，開發唔同嘅菜式，諗吓點樣將地上嘅嘢食帶上天空，對我嚟講係煮嘢食之上嘅另一層次。」頭等艙的煲仔飯、漢堡包、韓式粉絲也是成功例子。Leo在香噴噴的食物氣味中笑說：「依家眼界開闊好多，廚房其實比想像中大！」
每天在廚房工作，回到家中也負責家人的晚飯嗎？Leo想也不想便說：「屋企廚房由阿媽話事！」
由於衞生關係，只有離開廚房範圍，Leo才可脫下口罩，讓我們一睹他的招牌笑容。
機場話理知
製作飛機餐有一套完善的系統，才可有效率地處理如此龐大數量的食物。每個盛載食物的膠盤都有一張貼紙，上面簡單的數字和符號蘊含了不同意思，方便不同崗位的同事溝通，並確保食物符合「先入先出」的運轉原則。
- 右邊的巨型數字代表食物在「星期幾」製作，例如「2」代表星期二
- 上下兩排數字代表食物的製作時間
- 手寫的英文字母是航空公司代號
#機場神奇俠 #天空廚神 #無名英雄 ＃重質亦重量 ＃機場 ＃食物安全 ＃飛機餐 ＃空廚